2025 жылғы 13 қараша күні Алтынсарин ауданының 16 білім беру ұйымы базасында «Заң және жасөспірім: кәмелетке толмағандардың жауапкершілігі» атты ауқымды дөңгелек үстел өтті. Іс-шара құқық қорғау органдарының және өзге де мүдделі қызметтердің өкілдерінің қатысуымен ұйымдастырылды. Дөңгелек үстел жұмысына 8–11-сынып оқушыларын және педагогикалық қызметкерлерді қоса алғанда, барлығы 526 адам қатысты.
Талқылау барысында кәмелетке толмағандардың құқықтық жауапкершілігі, жастар арасындағы құқық бұзушылықтың алдын алу және өскелең ұрпақтың құқықтық санасын қалыптастыруға қатысты өзекті мәселелер қарастырылды. Қатысушыларға құқық қорғау органдарының өкілдеріне сұрақтар қою, нақты жағдайларды талқылау және құқыққа қарсы іс-әрекеттердің құқықтық салдары туралы ақпарат алу мүмкіндігі берілді. Ерекше назар киберқауіпсіздік пен интернет кеңістігіндегі жауапкершілік мәселелеріне аударылды.
Алтынсарин ауданының білім бөлімі барлық қатысушылар мен ұйымдастырушыларға белсенді азаматтық ұстанымы және жастардың құқықтық тәрбиесіне қосқан үлесі үшін алғыс білдіреді. Осындай іс-шараларды өткізу ауданда заңдылық пен құқықтық тәртіптің нығаюына ықпал етеді.
